Rusiya Kinosu Günü ilə əlaqədar avqustun 27-də saat 20.30-da “Zagulba fm”də Bakıdakı Rus Evinin dəstəyi ilə rusiyalı və azərbaycanlı rejissor, prodüser, Azərbaycan Kinematoqrafçılar İttifaqı nəzdində Kino məktəbinin direktoru Oleq Səfərəliyevin “Qorxu mağarası” filmi nümayiş olunacaq.
Filmdə gənc cütlük olan Kuznetsovların ailə həyatında baş verən böhrandan söhbət açılır. Ailədə kiçik qız böyüyür və onlar bu səbəbdən münasibətlərini qoruyub saxlamağa cəhd edirlər. Cütlük günü birgə, bütöv ailə kimi keçirmək qərarına gəlir və attraksionlar parkına yollanırlar. “Qorxu mağarası” adlanan attraksionun birində onların qızları müəmmalı şəkildə yoxa çıxır. Kuznetsovlar qızlarını axtarmaq məqsədilə yerli polis bölməsinə müraciət edirlər. Daha sonra cəfəng kabus başlayır: parkda belə attraksion aşkar edilmir.
Təqdim olunacaq ekran əsərində rollarda Viktoriya Tolstoqanova, Sergey Qorobçenko, Nina Ruslanova, Viktor Kosıx və digərləri çəkiliblər.
